﻿Liwola tayamo Yeisu ana tosabokuli yaidi.
1.
Boi nimatu Yaubada ina tokabivalavalayao sopadi goi tubudao ivadigoidi go, giyaina giyaina be ta kenao ta kenao goi ina livalayana ivinidi. 
Ame tuta ana kaba lukavava Natuna goi ivadigoida. 
Tauyana Yaubada ana káeyana kanukanununa 
Tauna anerose itaoyakukuidi 
Moitamo, anerose itaoyakukuidi. Ava anerose yaina goi Yaubada ibóbwara idigo kana, ‘Kom natugu; yau ame avanatunem’? Same 2:7 Geya tayaamo yaina. O aiyuwoina ava anerose yaina goi ibóbwara idigo kana, ‘Yau Tamana, e Tauyana natugu’? 2 Samwera 7:14 Geya tayaamo yaina. 
E tuwaina, tutayana Yaubada ina totubukumgo ivamoleye ima poyapoya ame goi, Yaubada idigo kana, ‘Latuwogu guna aneroseyao madabokidi Tauyana yaina sisakulūlu.’ Same 97:7 
Aiyuwoina aneroseyadi manudi idigo kana, ‘Yágira ietako ina aneroseyao nakae. Yeu sabeninimina iepaisewe ina tovaitayao nakae. Tauyana manuna sipaaisewa.’ Same 104:4 
Go Natuna yaina idigo kana, ‘Yaubada e, 
Kibóbwata anasíuna manuna nukotom ikabi go, apipilova kukaolilive. Moe pasina Yaubada, moe kom im Yaubada, amta bogina ikinavem go, kinavayana goi uyáwana gagaina kubabane be nakae semowo kutaoyakukuidi.’ Same 45:6-7 
Aiyuwoina Natuna ilatuwoko idigo kana, ‘Tomoya, 
Amo dogoiyadi bei sisáwala go, 
be tanigo nakae kununumidi kuyatoidi. Kwama nakae bei kuvalilividi go, aivaudi kulosidi. Go kom sem taum taum kwaaiyaka, nakae am tala geya sikavaveta.’ Same 102:25-27 
E ava anerose yaina Yaubada idigo kana, ‘Kūma wowoina basekoina kakataigu goi kutusōbu ana kadókana am kaleyayao avasobusobuyedi, e kulovinaedi’? Same 110:1 Geya tayaamo yaina. 
Go anerose kaga? Madabokidi baloma nakae, Yaubada ina tovaitayao ivamoleyedi sima bei kita ada yava taababane sivaiteda ae? 
